آخیشدی کونلومون پارلاق اولدوزو
بیر گئجه گوءزومون اوءنوندن ایتدی
باختیم قارا ایکن لاب قارا اولدو
خبرسیز گئدیشی کوءنلومو دیتدی
عیللتین بیلمه دیم بو آیریلیقین
آیریلیب یالقیزا چئویردی منی
دئیه سن یالاندان اولموشدو چیلغین
بلکه ده مجبورن سئویردی منی
آمما یوخ باغلییدی کوءنلو سئوگیه
دئیه سن گیزلی بیر درده یانیردی
سئوگیسی یالانسا آخی بس نییه
گوءزلری سئوگیدن چیپجالانیردی
دوغوردان او منی لاپدا سئویردی
دینلیردی دردیمی سوءزومو هر آن
سانکی اوره یینی دردلر دئشیردی
ایستیردی دینله یم دردینی بیر آن
داش اولموش اوره ییم بیلمه دی بونو
ایچینده بوغولدو گیزلی آغلادی
بیر حالدا گیزلتدی دردلری آیدین
دینله یه بیلمه دیم یارا باغلادی
بیر گئجه مکتوبون گوءردوم واراغا
یازمیشدی باغیشلا منی عوذور ایستیرم
اوره ییم دوءزمه دی ویدالاشماغا
خبرسیز گوءزه لیم چیخیب گئدیرم
یئنه ده دئییرم باغیشلا منی
آرخامجا گزیبن منی آراما
طالعین حوکمودور دانلاما منی
آغلاییب دوز باسما دردلی یاراما
خبرسیز آیریلیق نه چتین اولور
او واخدان حسرتی باغریمی ازیر
بولود تک کیشنه ییب قلبیمه دولور
گوءره سن او منسیز هایاندا گزیر
یازیقلار-یازیقلار منه یازیقلار
اولسون گرکدیر من نه اینسانام
اینسانسا اینسانین قدرینی بیلر
بیلمه یه ن اینسانا حارامدی یاشام
اینسانلار-اینسانلار سئویب سئویلین
سئوگیزه سئوگییله سئوگی گوءسترین
بئش گونلوک دونیادیر نیفرتی سیلین
دردلره دوءزمکله سئومک ایسترین
عومور گئدرگیدیر کیمسه یه قالماز
سئوگیلی گونلرین قدرینی بیلین
گرچکدن سئویشن حسرته دولماز
سئوینجیز سئوگیزدیر اینصافا گلین
ایندی دانلاییرام اوءزوم -اوءزومو
نییه دینله مه دیم من نئجه اره م
ائشیدین دوسلاریم دردلی سوءزومو
ائیله یین سئوگیزه اورکدن کرم
